Республикалық адвокаттар алқасының төралқасы адвокаттардың кәсіби киімі – мантия мен оның сипаттамасын ресми түрде бекітті, деп жазады inbusiness.kz сайты.
Адвокаттық мантия – құқық қорғау қызметін жүзеге асыратын тұлғаның ерекше қоғамдық-құқықтық мәртебесін білдіретін нышан. Ол адвокатты кәсіби қызметіне кедергі келтіруі мүмкін тінту, қудалау және басқа да араласулардан қорғауға бағытталған кәсіби артықшылықтың белгісі саналады.
— Мантия кию – міндет емес, әр адвокаттың таңдауы. Құқық қорғаушы сот процесінде мантия кию-қимайтынын өзі шешеді. Сонымен қатар, мантияны ресми іс-шараларда да қолдануға болады, – делінген Республикалық адвокаттар алқасының баспасөз хабарламасында.
2024 жылы өткен III республикалық адвокаттар спартакиадасы аясында мантия жобалары алғаш рет таныстырылып, 300-ге жуық адвокат қатысқан анонимді сауалнама жүргізілді. Нәтижесінде, кеңірек талқылау қажеттілігі туындап, бүкіл ел бойынша 3 мыңнан астам адвокат қатысқан ашық онлайн сауалнама ұйымдастырылды.
Адвокаттар қауымдастығының пікірі негізінде және аумақтық алқалардың ұсыныстары ескеріле отырып, Республикалық адвокаттар алқасының төралқасы мантияның келесі үлгісін бекітті:
Адвокаттық мантияның негізгі сипаттамалары:
- Қара түсті матадан тігілген, жағасы көгілдір — бұл түс Қазақстан туын бейнелейді;
- Жағасы мен сәндік ленталарда "Қорғау" ұлттық өрнегі қолданылған — бұл "тұмар" немесе қорғау белгісін білдіреді (дизайн "OIU Qazaq Design" жинағынан алынған);
- Ашық фасон (түймесіз және бекіткішсіз) – адвокаттың еркіндігі мен тәуелсіздігін бейнелейді;
- Симметриялы көк ленталар – теңдік пен әділеттіліктің символы.
Адвокаттар мантияны кез келген тігін шеберханасында өз таңдауы бойынша тіктіре алады, басты талап – оның ресми сипаттамаға сай келуі.
Адвокаттық мантияны кию тәртібі мен сипаттамасына қатысты толық ақпаратпен Республикалық адвокаттар алқасының ресми сайтында – advokatura.kz танысуға болады.
