Желтоқсан айында дәнді және майлы дақылдарды тікелей сатып алуды жариялаған Азық-түлік корпорациясы ішкі бағаларға әсер етпей қоймады, деп хабарлайды inbusiness.kz сайты eldala.kz сайтына сілтеме жасап.
Экспорттық бағалар Орталық Азия елдеріне және алыс нарықтарға жаппай жөнелту аясында өсіп жатыр. Мұны Қазақстан Астық одағы талдау комитетінің басшысы Евгений Карабанов мәлім етті.
Сарапшының сөзінше, қаңтар айының өткен күндері желімшесі 23-24 (88-92 мың) және желімшесі 25-26 (93-97 мың) 3-сыныпты бидайдың, сондай-ақ 4-сыныпты бидайдың (80-83 мың) бағасы тоннасына 1 мың теңгеге өсті. 5-сыныпты бидайдың бағасы 2 мың теңгеге өсті, тоннасына 77-80 мың теңге болды.
Желтоқсанның соңғы күндерінде "Сарыағаш" станциясы бағытында астық пен ұн жаппай жөнелтілген. Сонымен қатар, Әзірбайжан мен Грузияға, Поти портына, Ресейдің Балтық порттарына және Балтық жағалауы елдерінің порттарына жөнелтілімдер жүзеге асырылуда.
– Осы бағыттарда тиеп-жөнелтуді жандандыру 2026 жылға бидай экспортына көлік шығыстарын субсидиялауды ұзартумен байланысты, – дейді сарапшы.
Сондай-ақ, ҚТЖ әлі де Сарыағаш станциясы бағытындағы қозғалысты реттейді. Достық (күн райы жағдайлары бойынша) және Алтынкөл (Қорғастағы крандарды жөндеу себебінен) станциялары бағытында жөнелтуге шектеулер сақталуда.
– Экспорттық бағалардың өсуі импорттаушыларда бұрын қолданыста болған теміржол тиеу шектеулері, сондай-ақ бағамдық ауытқулар себебінен тауар тапшылығына байланысты, – деді Евгений Карабанов.
Арпаның экспорттық бағасы көп бағытты динамиканы көрсетті: DAP Сарыағашта 2 USD/t (212-217 USD/t) өсті, DAP Достық/Алтынкөлде 3 USD/t (200-205 USD/t) төмендеді, FOB Ақтауда 5 USD/t (220-225 USD/t) төмендеді.
– Астық пен ұнды тиеудің алдыңғы шектеулері Орталық Азия елдерінің нарықтарында тапшылықтың пайда болуына және бағаның өсуіне әкелді. Бидайдың әртүрлі санаты арасындағы бағаның айырмасы төмендеді. Субсидияланатын бағыттар бойынша бидайды жөнелтуді жандандыру ішкі нарықта 23-24 желімшесі бар 4-сыныпты және 3-сыныпты бидайға сұранысты күшейтеді. Иранның арпаға деген сұранысы ирандық сатып алушылардың төлем қабілеттілігімен шектеледі. Басқа бағыттарда DAP Сарыағаш және DAP Достық/Алтынкөл арпаның бағасы айтарлықтай тұрақты, – деп қорытындылады Евгений Карабанов.
