Нұрсұлтан Назарбаев ДСҰ-ның 12-ші министрлік конференциясын өткізу туралы келісімге қол қойды, деп хабарлайды ҚР сауда және интеграция министрлігінің баспасөз қызметі.
ҚР сауда және интеграция министрі Бахыт Сұлтановтың Женеваға сапары аясында Қазақстан Республикасының Үкіметі мен Дүниежүзілік Сауда Ұйымы арасындағы ДСҰ-ның 12-ші министрлік конференциясын өткізу туралы келісімге қол қойылды.
ДСҰ Бас директоры Роберто Азеведо Қазақстанды 12-ші министрлік конференциясының төрағасы қызметіне сайлануымен құттықтап, біздің еліміз өткізетін халықаралық сауда саласындағы жаһандық іс-шараға дайындық шеңберінде ДСҰ-ның тығыз ынтымақтастыққа дайындығын растады.
Министр Сұлтанов ДСҰ-ның алдағы Министрлік конференциясының ықтимал субстантивтік қорытындыларын талқылау мақсатында ДСҰ-ға мүше елдердің негізгі Елшілерімен кездесті. Кездесу барысында ол бүгінгі көпжақты сауда жүйесі протекционизм және бір жақты сауда шаралары түріндегі теңдессіз сын-қатерлерге тап болатынын атап өтті. Осыған байланысты Министр маңызды шешімдер қабылдау мақсатында 2020 жылы Нұрсұлтан қаласында ДСҰ-ға ағымдағы сын-қатерлер мен қажеттіліктерге толық сәйкес келуге мүмкіндік беретін белсенді бірлескен жұмысқа шақырды.
ДСҰ-ның 12-ші министрлік конференциясының күн тәртібіндегі негізгі келіссөз бағыттары ДСҰ-ны реформалау мәселелері, қызметтерді реттеу, инвестициялар мен электрондық саудаға жәрдемдесу саласындағы жаңа жаһандық ережелер, сондай-ақ балық аулау субсидиялары бойынша келіссөздер болады деп күтілуде.
