2026 жылғы 9 айдың қорытындысы бойынша құрылыс жұмыстарының көлемі 2025 жылғы осы кезеңмен салыстырғанда 11,5%-ға ұлғайып, 7 812,3 млрд теңгені құрады, деп жазады inbusiness.kz сайты.
Ұлттық статистика бюросының мәліметінше, өсім ғимараттар мен құрылыстарды салу және жөндеу жұмыстары көлемінің 14,7%-ға артуына байланысты.
Құрылыс жұмыстарының жалпы көлемінде жеке құрылыс ұйымдарының үлесі 89%, шетелдік ұйымдардың үлесі 10,3%, мемлекеттік ұйымдардың үлесі 0,7%-ды құрайды.
Есепті мерзімде орындалған құрылыс жұмыстарының (қызметтерінің) түрлері бойынша ең көп үлесті автомобиль, теміржолдары мен метролар (25%), тұрғын емес ғимараттар (21,5%) және тұрғын үйлердің (12,6%) құрылысы алады.
Өңірлік бөліністе республиканың 17 өңірінде құрылыс жұмыстарының көлемі ұлғайып отыр.
Атап айтқанда:
- Ұлытау облысында (2,4 есе);
- Қызылорда облысында (31,5%);
- Шымкент қаласында (25,4%);
- Атырау облысында (22,2%);
- Павлодар облысында (18,8%);
- Алматы қаласында (18,1%);
- Түркістан облысында (17%);
- Шығыс Қазақстан облысында (15,2%);
- Ақтөбе облысында (12,3%);
- Абай облысында (11,5%);
- Алматы облысында (11%);
- Астана қаласында (11,1%).
2026 жылғы қаңтар-қыркүйекте пайдалануға берілген жаңа нысандардың жалпы алаңы 16 348,9 мың шаршы метрді құрады.
Пайдалануға берілген тұрғын үйдің ауданы 2025 жылғы қаңтар-қыркүйекпен салыстырғанда 2,7%-ға ұлғайып, 13 197,7 мың шаршы метрді құрады.
Оның ішінде:
- 8561,5мың шаршы метр – көп пәтерлі;
- 4 592,2мың шаршы метр – жеке үйлер.
