21 сәуірде оларға Штутгарт әуежайының қызметкерлері мен теміржолшылар қосылады.
Гамбург, Дюссельдорф пен Кельн/Бонн әуежайларында қауіпсіздік қызметкерлерінің екі күндік ереуілі басталды, деп жазады inbusiness.kz DW сайтына сілтеме жасап.
Бүгін Кельн/Бонн әуежайында 204 рейстің 121-і тоқтатылды, нәтижесінде 28 мыңға жуық жолаушы діттеген жеріне жете алмады. Дюссельдорфта да рейстер тоқтатылып, әуежайда күту уақыты созылған. Гамбург әуежайының басшылығы 20 және 21 сәуірде барлық рейстерді, сондай-ақ келетін рейстердің үштен бірін тоқтатты, нәтижесінде 80 мыңға жуық жолаушы ұшып кете алмады.
21 сәуірде Ver.di кәсіподағы бастаған ереуілге Штутгарт әуежайының қауіпсіздік қызметкерлері, сондай-ақ теміржол қызметкерлері қосылады. EVG теміржол көлігі кәсіподағы сағат 3.00-ден 11.00-ге дейін (Мәскеу уақытымен 7.00-16.00) ескерту ретінде ереуіл жариялады.
Ver.di әуежай жұмысшылары үшін түнгі жұмыс уақытында, демалыс әрі мереке күндері жұмыс ақысын көбейтуді, сондай-ақ үстеме ақы төлеуді талап етеді. 11 және 12 сәуірдегі тарифтік келіссөздер аясында тараптар келісімге келе алмады, келесі келіссөздер 27-28 сәуірге жоспарланған. EVG одағы неміс теміржол қызметкерлерінің жалақысын 12 пайызға, яғни айына кемінде 650 еуроға көтеруді сұрайды.
