2021 жылы қазақстандықтар арасында полицияға сенім деңгейі артқан, деп хабарлайды inbusiness.kz порталы ranking.kz-ке сілтеме жасап.
Өткен жылы қараша-желтоқсанда сауалнамаға қатысқан қазақстандықтардың 34,5%-ы өздері тұратын аудандағы қауіпсіздік деңгейін қанағаттанарлық деп бағалаған. Осыған дейін 2021 жылғы сәуір-мамырда халықтың 32,2%-ы қауіпсіздік деңгейі қанағаттанарлық деп баға берген. Қауіпсіздік деңгейіне қанағаттанбағандардың үлесі өзгеріссіз қалды – 4,7%.
Өткен жылы қараша-желтоқсанда өздері тұратын аудандағы қауіпсіздік деңгейін қанағаттанарлық деп есептемейтін әйелдердің үлесі – 5%, ерлер – 4,3%. Қауіпсіздік деңгейіне толық қанағаттанған ерлердің үлесі – 36,9%, ал әйелдер – 32,4%.
Деректер "Халықтың құқық қорғау органдарына сенім деңгейін" іріктемелі зерттеу нәтижелерінен алынған. Зерттеуге 18 мың үй немесе Қазақстан бойынша үйлердің жалпы санының 0,35% қатысқан.
Халықтың қауіпсіздік деңгейіне қанағаттануының өсуіне қарамастан құқық қорғау органдарының өз ауданындағы көшелерді күніне кемінде бір рет патрульдейтінін атап өткен қазақстандықтардың үлесі 2021 жылғы сәуір-мамырда 31,8%-дан қараша-желтоқсанда 28,3% дейін азайған.
Көшелерде полициялардың сирек патрульдейтінін айтқан халықтың үлесі 13,8%-дан 15,7%-ға дейін өскен.
Респонденттердің басым бөлігі құқық қорғау органдарына көмек сұраған – 85,6%. Прокуратура органдарынан көмек сұрағандар үлесі – 13,3%, экономикалық тергеу қызметі – 0,8%, сыбайлас жемқорлыққа қарсы қызмет – 0,4%.
Полицияға сенуге болады дейтін қазақстандықтардың үлесі 2021 жылы 38,7%-дан 41%-ға дейін өскен.
Тәртіп сақшысына сенуге болады дегенмен ішінара келіскендер саны аз болды (қараша-желтоқсанда – 33,6%, сәуір-мамырда – 38,1%).
Полицейлерге сенуге болмайды дейтін респонденттердің үлесі де азайған (ішінара – 6,1%-дан 4,3%-ға дейін, толық – 2,6%-дан 2,2%-ға дейін).
Полициямен ешқашан бетпе-бет кездеспеген респонденттердің үлесі жарты жылда 14,5%-дан 18,9%-ға дейін өскен.
2021 жылғы қараша-желтоқсанда сұраққа жауап бергендердің 30,3%-ы полицияға деген сенімнің төмен деңгейін немесе тіпті толық сенімсіздіктің себебін тәртіп сақшыларының кәсібилігінің төмен деңгейімен байланыстырды.
Жауап бергендердің тағы 29,4%-ы полицейлер тұрғындарды құқығын қорғағанның орнына жиі жазалайтынын, 26,7%-ы бұрын полициядан көмек сұрағанын, сенімді ақтамағанын, 25,8%-ы полицейлерді жемқор деп санайтынын атап өткен.
Сондай-ақ сұрақ қойылғандардың 9,5%-ы полициядан қорқатынын айтқан. Жауап бергендер полицияға көзқарасы (сенетінін немесе сенбейтінін) БАҚ-тағы ақпараттан (34,2%), интернет (28,8%), достары мен таныстарының пікірлері (26,5%), жеке тәжірибесі (22,6%) негізінде қалыптасатынын айтты.
Дәурен Ерболат
