Енді халықаралық олимпиадалардың жеңімпаздары мен жүлдегелері университетте тегін оқи алады. Бұл туралы Білім және ғылым министрлігі Асхат Аймағамбетов Telegram-дағы арнасында жазды, деп хабарлайды inbusiness.kz.
"Жаңа бұйрық бекітілді. Халықаралық олимпиадалардың, спорттық және шығармашылық байқаулардың тізбесін бекіту туралы бұйрыққа қол қойдым. Бұл құжат жеңімпаздар мен жүлдегерлерге отандық ЖОО-да бейінді бағытта білім алу үшін гранттар бөлуге мүмкіндік береді", - деді министр.
Оның айтуынша, осыған дейін Президент Қасым-Жомарт Тоқаевтың Қазақстан халқына Жолдауында берген тапсырмасы аясында заңнамаға өзгерістер енгізілген.
"Енді беделді халықаралық пәндік олимпиадалардың, спорттық жарыстардың және әлемдік деңгейдегі шығармашылық байқаулардың жеңімпаздары мен жүлдегерлері ҰБТ тапсырмай-ақ ЖОО-ға бейінді бағыттар бойынша грантқа түсуге мүмкіндік алды", - деп жазды Асхат Аймағамбетов.
Айта кетейік, бүгін Білім және ғылым министрлігі Дүниежүзілік гимназиада – 2022 жылғы жеңімпаздар мен жүлдегерлерін марапаттау рәсімін өткізеді.
"Оқушылар әлемнің 70-тен астам елінен келген жасөспірімдерді басып озып, 86 медаль жеңіп алған. Осылайша, ұлттық құрамамыз ІІІ орынды иеленді.
Енді олар бірінші болып, ЖОО-да оқу үшін гранттар алады.
Жас дарындар Мемлекет басшысының шешімі арқасында осындай қолдауға ие болып отыр", - деді министр.
