Ресейлік әскерилердің елшілікке жасаған соққыларын "достыққа жатпайтын жат қадам" деп атады, деп жазады inbusiness.kz сайты.
Ильхам Алиевтің сөзінше, алғашқы шабуылдан кейін бұл кездейсоқ болуы мүмкін деп саналған. Алайда Әзербайжан тарапы дипломатиялық нысандардың координаттарын Ресейге бергеніне қарамастан, тағы екі соққы жасалған.
Өз кезегінде Ресей сыртқы істер министрлігі бұл айыптауларға таңданыс білдіріп, әуе соққыларын жоспарлау кезінде дипломатиялық нысандардың орналасуы міндетті түрде ескерілетінін мәлімдеді.
"Әзербайжанның Киевтегі дипломатиялық миссиясының ғимараттар кешеніне келтірілген зақым, ең ықтимал нұсқа бойынша, Украина Қарулы күштерінің әуе қорғанысы құралдарының дұрыс жұмыс істемеуінің салдарынан болған", – делінген Ресей сыртқы істер министрлігінің баспасөз қызметі РБК басылымына берген мәлімдемесінде.
Ресей СІМ дипломатиялық миссия ғимараттарының зақымдануына байланысты шынайы өкініш білдіргенін атап өтті.
