Қырғызстан парламентінің бұрынғы депутаты Шайырбек Ташиев 16 мамырға дейін қамауға алынды. Бұл туралы "Кабар" агенттігіне Бішкек қаласының Бірінші май аудандық соты мәлімдеді, деп хабарлайды inbusiness.kz сайты жергілікті басылымға сілтеме жасап.
БАҚ-тың хабарлауынша, 2 сәуірде өткен сот отырысында Шайырбек Ташиевті бір ай мерзімге №1 тергеу изоляторына қамауға алу туралы шешім қабылданған. Бұған дейін елдің Ішкі істер министрлігі бұрынғы депутаттың "Қырғызмұнайгаз" компаниясындағы сыбайлас жемқорлық ісі аясында ұсталғанын хабарлаған еді.
24.kg агенттігінің жазуынша, Ташиев өз кінәсін мойындамады. Бұл туралы оның адвокаты Жырғал Бабаев мәлімдеді. Оның айтуынша, айыптау тиісті деңгейде негізделмеген, сондықтан қорғау тарапы сот шешіміне шағымданбақ. Сондай-ақ Бабаев экс-депутаттан жауап алынып, ол тергеудің барлық сұрағына жауап бергенін жеткізді. Қазір қамауда ұстау жағдайына қатысты шағым түскен жоқ.
Айта кету керек, бұған дейін Жогорку Кенештің экс-депутаты Шаирбек Ташиев ұсталғанын жазғанбыз.
