Облысы прокуратурасы инвесторлар мен кәсіпкерлердің құқықтарын қорғау аясында бірнеше заңсыз әкімшілік шараның күшін жойды, деп хабарлайды inbusiness.kz сайты.
Прокуратура мәліметінше, бұл жұмыстар Бас прокуратураның Инвесторлардың құқықтарын қорғау комитетімен бірлесіп жүргізіліп жатыр. Негізгі тетік ретінде "прокурорлық сүзгі" қолданылады. Ол арқылы мемлекеттік органдардың инвесторларға қатысты қабылдайтын шешімдері алдын ала прокуратурамен келісіледі.
Жыл басынан бері "прокурорлық сүзгі" арқылы 163 шешім қаралған. Соның ішінде 21 жағдайда кәсіпкерлерге заңсыз әкімшілік шара қолданудың алды алынған.
Прокурорлардың араласуынан кейін:
- төрт негізсіз тексеру тоқтатылды;
- "Сарыарқа" арнайы экономикалық аймағы қатысушысымен келісімді бұзуға жол берілмеді;
- 5,2 млн теңгеден астам заңсыз айыппұлдың күші жойылды.
Сонымен қатар прокуратура "TPA SARY ARKA" компаниясына қатысты тексеру заң талаптарын бұза отырып жүргізілгенін анықтаған. Атап айтқанда, тексеру құқықтық статистика органдарында міндетті тіркеусіз басталған.
Қадағалау органының мәліметінше, осыдан кейін екі лауазымды тұлға тәртіптік жауапкершілікке тартылған.
Бұдан бөлек, прокуратура наразылығынан кейін санитарлық-эпидемиологиялық бақылау органдары рұқсатсыз жүргізген үш бақылаулы сатып алудың нәтижелері жарамсыз деп танылды.
Прокуратура инвесторлардың құқықтарын қорғау өңірдегі негізгі басымдықтардың бірі болып қала беретінін мәлімдеді.
