Санитариялық автокөлік ӨЖЖ-аппараттарымен, пациенттің мониторларымен, дефибрилляторлармен, аға кезекші дәрігерге деректерді беру функциясы бар электрокардиографтармен қамтамасыз етілген. Сондай-ақ қажетті реанимациялық шараларды өткізуге арналған толық жиынтық бар: мамандандырылған бригадаларға арналған С класты реанимобильдерден фельдшерлік бригадаларға арналған А класты автомобильдерге дейін.
Реанимобильдер облыстың барлық қалалары мен аудандарына таратылады. Бұл өз кезегінде жедел жәрдем қызметі паркінің 60%-ын жаңартуға және қосалқы станцияларда резервтік құрам жасауға мүмкіндік береді.
"Бүгін облысқа 36 реанимобиль келді. Жыл соңына дейін тағы 24-і жеткізіледі. Бұл көліктер Денсаулық сақтау министрлігінің қолдауымен жеткізілуде. Жалпы өңірде коронавирусқа байланысты түрлі жағдайларға дайындық бойынша үлкен жұмыстар жүргізілуде. Бүгін 44 аурухана кез келген уақытта жұмысқа кірісуге дайын. Сондай-ақ біз дәрігерлер үшін барлық қажетті техникалық және басқа да жағдайларды жасауымыз керек. Бұл жаңа көліктер олардың жұмысына көмектеседі", – деді Жеңіс Қасымбек.
Жалпы жыл басынан бері облысқа әртүрлі модификациядағы және өтімділіктегі 300-ге жуық медициналық мақсаттағы машина келді.
Автопаркті жаңарту Қарағанды өңірінің тұрғындарына медициналық көмек көрсетудің сапасы мен уақтылығын айтарлықтай жақсартуға мүмкіндік береді.
