Қарағандыда "Green Technology" ЖШС жылыжай кешенінде 8 наурызға арнап 200 мың түп голланд қызғалдағы өсірілді, деп хабарлайды облыстық әкімдіктің баспасөз қызметі.
"Желтоқсан айында Голландиядан әкелінген қызғалдақтардың баданаларын отырғыздық. Тікелей жеткізіліммен келді. Барлығы – 12 сұрып, соның екеуі жаңа", - деді жылыжайдың бас агрономы Галина Кизилова.
Гүлдер көздің жауын алады. Қызыл, сары, жиегі алқызыл ақ түсті, көкшіл, қызғылт – кез келген талғамға сай түс бар.
"Биыл 50 мыңнан аса қызғалдақ Ақтауға жөнелтілсе, 20 мыңы Астанаға жол тартты. Павлодарда да көтерме сатып алушыларымыз бар", – деді Галина Кизилова.
Мұнда өсірілген қызғалдақтардың жартысынан астамы жергілікті нарықта сатылады.
Жылыжай кешені қияр өсіруге маманданған. Ал гүлдер – қосалқы өнім. Қызғалдақтар кесіліп алынған соң, оның орнына қияр отырғызылады.
