Маңғыстау облысы Түпқараған ауданында прокуратура инвесторлардың құқықтарын қорғау комитетімен бірлесіп, кәсіпкерлерді инженерлік желілерге қосу кезінде орын алған заңсыз әрекеттердің жолын кесті, деп хабарлайды inbusiness.kz сайты.
Қадағалау шараларының нәтижесінде 3 инвестор мен 16 кәсіпкердің құқықтары қорғалып, кінәлі лауазымды тұлғалар әкімшілік жауапкершілікке тартылды. Оларға жалпы сомасы 9,1 млн теңге айыппұл салынды.
Тексеру барысында табиғи монополия субъектілері электр және сумен жабдықтау желілеріне қосуға техникалық шарт беру кезінде заңнамада қарастырылмаған құжаттарды негізсіз талап еткені анықталды.
Сондай-ақ қызмет көрсету тәртібінің бұзылғаны белгілі болды: техникалық шарт беруден бас тарту туралы уәкілетті органдарға хабарламау және өтініштерді қарау мерзімдерін сақтамау фактілері тіркелді.
Прокурорлық қадағалау актілері негізінде екі табиғи монополия субъектісіне қатысты 16 әкімшілік іс қозғалды. Істер қаралып, кінәлі тұлғалар жауапқа тартылып, айыппұлдар толық көлемде өндірілді.
Қабылданған шаралар әкімшілік кедергілерді азайтуға, кәсіпкерлер мен инвесторлардың құқықтарын қалпына келтіруге және инженерлік желілерге қосу тәртібінің заңға сәйкестігін қамтамасыз етуге мүмкіндік берді.
Кәсіпкерлер мен инвесторлардың құқықтарын қорғау жұмысы прокуратура органдарының тұрақты бақылауында.
