"Каспий-2026" халықаралық оқу-жаттығуы Каспий маңы мемлекеттерінің құтқару қызметтері арасында практикалық тәжірибе алмасу және өзара іс-қимылды нығайту алаңына айналды, деп жазады inbusiness.kz сайты.
Қазақстан, Ресей, Иран, Түрікменстан және Әзербайжанның құтқару қызметтерінің қатысуымен өткен "Каспий-2026" халықаралық кешенді оқу-жаттығуы аяқталды.
Оқу-жаттығу барысында қатысушылар түрлі төтенше жағдайларға ден қою, зардап шеккендерді құтқару, алғашқы көмек көрсету, іздестіру-құтқару жұмыстарын жүргізу және бес мемлекеттің құтқару бөлімшелері арасындағы өзара іс-қимыл бойынша практикалық әрекеттерді пысықтады.
Бірлескен құтқару операциялары кезінде іс-қимылдардың үйлесімділігіне, тәжірибе алмасуға және Каспий маңы елдерінің құзыретті органдары арасындағы жедел өзара іс-қимыл тетіктерін жетілдіруге ерекше назар аударылды.
Мамандар төтенше жағдайлар кезінде жұмыс істеу, арнайы техника мен жабдықтарды қолдану, сондай-ақ іздестіру-құтқару іс-шараларын ұйымдастыру дағдыларын көрсетті.
Іс-шара қорытындысы бойынша Қазақстан ТЖМ-нің екі қызметкері Ресей ТЖМ-нің "Құтқару ісіндегі ынтымақтастық үшін" медалімен марапатталды.
