Маңғыстау облыстық балық шаруашылығы басқармасы теңіз жағалауынан итбалықтардың өлекселері табылғанын растады. Олардың неден өлгені әзірге белгісіз, деп жазады inbusiness.kz сайты.
"Каспий итбалығы" мемлекеттік табиғи резерватының инспекторлары 12 қазанда Түпқараған ауданындағы Баутин ауылының батыс жағалауын тексеру кезінде жануарлардың өлекселерін анықтаған. 11 қазанда Ақтау тұрғыны Баутин ауылы маңындағы ұзындығы 2,5–3 шақырым болатын жағалаудан бірнеше итбалықтың өлексесін көргенін хабарлаған. Ол түсірген фотосуреттерін жергілікті Lada.kz басылымына жолдаған.
Ауыл шаруашылығы министрлігінің Экология департаменті мамандары теңіз суы мен топырақтан сынама алды. Жақын арада санитарлық талаптарды сақтай отырып, жағалауды тазарту жұмыстары жүргізіледі.
Итбалықтардың қырылу себебі зертханалық сараптама нәтижесі шыққаннан кейін белгілі болады.
Мамандардың сөзінше, көктем мен күзде соғатын солтүстік-батыс және батыс бағытындағы қатты жел итбалықтардың өлекселерін теңіз жағалауына шығарып тастауы мүмкін.
