"Коронавирустың жаңа толқыны ең жойқын болып отыр. Соңғы күндері жүздеген азаматымыздан айырылып қалдық. Әр өңірде ауруханаға түскен науқастардың саны күрт көбейді. Жансақтау бөлімдерінің барлығы іске қосылды. Қосымша дәрі-дәрмек пен құрал-жабдық сатып алынды", - деді Қасым-Жомарт Тоқаев еліміздегі коронавирус індетіне байланысты эпидемиологиялық ахуал жөнінде кеңесте.
Президенттің айтуынша, вирус ешкімді аяп жатқан жоқ. Жасқа да, кәріге де ауыр тиіп тұр.
"Өзіміз бен туған-туыстарымызды қорғаудың бірден-бір жолы – вакциналау. Әлемдік медицина басқа амалдарды ойлап таппады. Болашақта одан жақсы жолды табуы қиын да секілді. Вакцина – өзіміз бен отбасымызды сақтаудың бірден бір амалы. Біздің қателіктеріміз үшін балаларымыз азап шекпеуі керек. Бейбіт заманда туғандарымыздан айырылып қалуға болмайды. Еліміздің әр азаматына айтарым: денсаулықты сақтаңыздар, туған-туыстың, отбасының амандығын ойлаңыздар! Ал, Үкімет пен өңір басшылары белгіленген міндеттердің бәрін мінсіз атқаруға тиіс", - деді ол.
Аян Бекенұлы
