Еліміздегі бірқатар әуежайда киберқылмыстың алдын алуға бағытталған ақпараттық науқан ұйымдастырылды, деп хабарлайды inbusiness.kz сайты.
Іс-шара "Заң және тәртіп" қағидаты аясында Көліктегі полиция департаментінің киберқылмысқа қарсы іс-қимыл бөлімінің бастамасымен өтті.
Атап айтқанда, Астана, Алматы, Өскемен, Қарағанды, Қызылорда, Петропавл, Орал, Шымкент, Тараз және Ақтау қалаларындағы әуежайларда арнайы анимациялық бейнероликтер көрсетілді. Олар күту залдары мен кіреберіс аймақтардағы LED-экрандар арқылы жолаушылар назарына ұсынылды.
Шараның басты мақсаты – азаматтардың киберқылмыс түрлері мен олардан қорғану жолдары туралы хабардарлығын арттыру. Сонымен қатар интернет кеңістігінде қауіпсіз мінез-құлық дағдыларын қалыптастыру көзделген.
Мамандардың айтуынша, технологиялардың қарқынды дамуы аясында интернет-алаяқтық деректері көбейіп келеді. Осыған байланысты халықты киберқауіптер туралы ақпараттандыру өзекті мәселе болып отыр.
Бейнероликтерде фишингтік сілтемелер, банк қызметкерлері атынан жасалатын жалған қоңыраулар, сондай-ақ мессенджерлер мен әлеуметтік желілердегі алаяқтық схемалар түсіндірілген.
Сондай-ақ, азаматтарға жеке деректерді қорғау, онлайн-қызметтерді қауіпсіз пайдалану және күмәнді ақпаратты тексеру бойынша кеңестер берілді. Полицейлер интернет арқылы қаржылық операциялар жасағанда сақ болуға және құпия мәліметтерді бөгде адамдарға бермеуге шақырды.
