"Мен көршілес елдерге іссапарға барған кезімде бизнесмендеріміздің өзара қарым-қатынасын ретке келтіруді мақсат тұттым. Әйтсе де екіжақты ірі үкіметаралық құжаттарға қолды мен қоймаймын. Өзбекстан мен Тәжікстанға барған сапарымда біз үш облыстан аралап шықтық. Ол облыстарға алдағы уақытта көтерме-бөлшектік орталықтар орналастырылады. Яғни біздің бизнесмендердің орталықтары сол жерде жұмысын бастайды. Кәсіпкерлеріміз сол елдерге инвестиция құю арқылы сапалы өнім қорын қалыптастырып, Қазақстан, артынша Ресейге экспорттауды көздейді", - деді министр ОКҚ алаңында өткен баспасөз мәслихатында.
Бақыт Сұлтановтың айтуынша кәсіпкерлер екі елмен 3 млн долларға 6 келісім жасасқан. Осылайша, сол елдерден контрагенттерді тауып, жүйе жолға қойылып келеді.
"Келесі жылы осы келісімдердің саны да, сомасы да екі еселенер деген сенімдеміз", - деді ол.
Аян Бекенұлы
