Қазақстан мен Алтай өлкесі арасында өзара тауар айналымын екі аймақтың кәсіпкерлерінің қарым-қатынасын жолға қою арқылы ынталандыру қажет. Алтай Тауар-өнеркәсіп палатасы ұйымдастырған бизнес-форумына қатысқан екі елдің кәсіпкерлері осындай шешімге келіп отыр.
"Қазір тауар айналымын арттыруда кәсіпкерлерге иек артылуда. В2В-байланыстар негізгі рөл атқара бастады. Біздің кәсіпорындарымыз өлкенің ауыл шаруашылығы өндірушілерін жақсы таниды. Өзге салаларда да өзара терең қарым-қатынастар орнауы тиіс", – деді Қазақстанның Омбыдағы консулы Эльдар Қонаев, деп жазады "Интерфакс-Сибирь".
Консулдың айтуынша, екі аймақтың тауар айналымы алдыңғы жылдың деңгейімен салыстырғанда 30%-ға төмендеп кеткен. Алайда шекараның екі жағына тасымалданған тауардың көлемі бұрынғы деңгейінде қалып отыр. Атап айтқанда, былтыр өзара сауда-саттық деңгейі 277 млн долларды құрады, оның 169 млн-ы алтайлық кәсіпорындардың экспортына тиесілі.
"Өзара сауда-саттық рубль мен теңгенің долларға шаққандағы бағамының төмендеуіне байланысты 33%-ға төмендеді. Дегенмен өзара тауар жеткізу көлемі 6%-ға ұлғайғаны байқалды", – деді Алтай ТӨП Борис Чесноков.
Екі өңірдің өзара іс-қимылы Қазақстан мен Ресей арасындағы бірыңғай кедендік кеңістіктің арқасында жыл өткен сайын жеңілдеп келеді.
Бүгін, 8 қарашада өтіп жатқан бизнес-форумға Барнаулға Қазақстаннан диагностикалық қондырғылар, сыр-бояу материалдары, пластикалық өнімдер, жылу өткізбейтін материалдар, алкогольсіз ішімдіктер өндірумен айналысатын кәсіпорындардың өкілдері қатысып жатыр.
