2026 жылдың қаңтар–қазан айларында Қазақстан мен Қытай арасындағы теміржол арқылы жүк тасымалының көлемі 31,8 млн тоннаға жетті, деп хабарлайды inbusiness.kz сайты.
Бұл өткен жылдың сәйкес кезеңімен салыстырғанда 8%-ға көп. Былтыр осы уақытта 29,4 млн тонна жүк тасымалданған.
Екі бағытта да өсім байқалады. Атап айтқанда, Қытайдан Қазақстанға 12,1 млн тонна жүк жеткізілді. Бұл өткен жылмен салыстырғанда 9%-ға жоғары.
Оның ішінде Достық станциясы арқылы 5 млн тонна жүк тасымалданып, өсім 13%-ды құрады. Ал Алтынкөл станциясы арқылы жүк тасымалы 6%-ға артып, 7,1 млн тоннаға жетті.
Ал Қазақстаннан Қытайға 19,7 млн тонна жүк жөнелтілді. Бұл былтырғы көрсеткіштен 8%-ға артық.
Кері бағытта Достық станциясы арқылы 13,1 млн тонна жүк тасымалданып, өсім 12%-ды құрады. Ал Алтынкөл станциясы арқылы 6,6 млн тонна жүк өткізіліп, көрсеткіш 1%-ға артты.
Жүк тасымалы көлемінің өсуіне екі ел арасындағы көлік-логистикалық байланысты дамыту, шекара маңындағы инфрақұрылымды жаңғырту және өткізу қабілетін арттыру бағытындағы жұмыстар ықпал етіп отыр.
