Мұндай келісім Исламабадта өткен Қазақстан мен Пәкістан арасындағы сауда-экономикалық, ғылыми, техникалық және мәдени ынтымақтастық жөніндегі үкіметаралық комиссияның 1-отырысында жасалды.
"Біздің кәсіпкерлер қазақстандық өнімді Пәкістан нарығына, атап айтқанда дәнді және бұршақты дақылдар, өсімдік майы, макарон, ұн мен кондитерлік өнімдерді экспорттауға, ал Қазақстан өз тарапынан жеміс-көкөніс өнімдерін импорттауға мүдделі. Болашақта біздің ел Пәкістан нарығына 411 млн доллардан астам сомаға әртүрлі салалардағы өңделген тауарлардың 80-ге жуық түрін жеткізуге дайын", - деді Сауда және интеграция министрі Серік Жұманғарин.
Аталған үкіметаралық комиссия жұмысының қорытындысы бойынша тараптар 9 құжатқа қол қойды.
"Жүктер транзиті және тасымалдау бойынша ынтымақтастық туралы меморандумға қол қойдық. Қазіргі кезде басқа әлеуетті серіктестермен Қостанайдан Хайратонға дейін 2 500 тонна ұн және Пәкістаннан жылына 50 мың тоннаға жуық картоп тасымалдау мәселесін талқылап жатырмыз", - деп тоқталды қазақстандық "Dala Trans" ЖШС коммерциялық директоры Нұрсұлтан Нәжіметдинов.
