Қазақстан паспорты халықаралық рейтингте 57-орынға көтерілді

Бұған дейін, қаңтар айындағы рейтингте Қазақстан 61-орында болған.

Henley & Partners компаниясы жариялаған Henley Passport Index деректеріне сәйкес, қазақстандықтар әлемнің 78 еліне визасыз немесе жеңілдетілген тәртіппен бара алады.

Жаңартылған рейтингте 1-орынды Сингапур иеленді. Одан кейін Жапония мен Оңтүстік Корея орналасқан. Ал тізімнің соңында Ауғанстан тұр – бұл ел азаматтары небәрі 24 мемлекетке визасыз кіре алады.

Орталық Азия елдері арасында Қазақстан ең жоғары позицияны сақтап отыр. Аймақтағы өзге мемлекеттердің көрсеткіші мынадай: Өзбекстан мен Қырғызстан – 73-орында, Тәжікстан – 79-орында, ал Түрікменстан 87-орында тұр.

Henley Passport Index – әлемдегі ең беделді паспорт рейтингтерінің бірі. Ол Халықаралық әуе көлігі қауымдастығы (IATA) деректеріне сүйене отырып жасалады және ел азаматтарының визасыз сапар мүмкіндігін бағалайды.