Қазақстан Үкіметі республикада Pfizer және AstraZeneca компанияларының дәрілік препараттар өндірісін ашуды жоспарлап отыр, деп жазады inbusiness.kz.
Премьер-Министр Үкімет мемлекеттік қолдау шараларының пакеттерін ұсына отырып, фармацевтикалық индустрияның әлемдік ірі өкілдерімен де белсенді іскерлік байланыстарды арттыратынын атап өтті.
"Pfizer компаниясымен Дәрі-дәрмек өндірісін локализациялау бойынша инвестициялық келісім жасау жоспарланып отыр. AstraZeneca компаниясымен инвестиция көлемі $32 млн болатын бірегей дәрілік заттардың келісімшарттық өндірісін құру туралы уағдаластыққа қол жеткізілді", — делінген ҚР Үкіметі баспасөз қызметі хабарламасында.
Сонымен бірге ҚР Президентінің АҚШ-қа сапары барысында GE Healthcare компаниясымен құны $60 млн болатын медициналық техника өндірісін локализациялау жөніндегі негіздемелік келісімге қол қойылды. Сондай-ақ Roche компаниясымен $2,5 млн сомаға бірқатар жоба пысықталып жатыр. Оңтүстік Корея, Түркия, Египет және Израиль инвесторларымен келісім-шарттық өндіріс жобалары жүзеге асырылуда.
