2026 жылғы шілдеде Enbek.kz Электрондық еңбек биржасында жұмыс берушілер 104,6 мың бос орын жарияласа, жұмыс іздеушілер 141,2 мың түйіндеме орналастырған. Маусыммен салыстырғанда сұраныс 3,8%-ға азайып, ұсыныс (түйіндеме) 11,5%-ға өскен, деп жазады inbusiness.kz сайты.
ҚР Еңбек және халықты әлеуметтік қорғау министрлігі бұл өзгерісті жаз айларындағы еңбек нарығының маусымдық ерекшелігімен, әсіресе оқу орындары түлектерінің нарыққа белсенді шығуымен түсіндіреді.
Өңірлік көшбасшылар: Ең көп вакансия Астана қаласында (8,8 мың), Түркістан (7,6 мың), Павлодар (7,1 мың) облыстарында, Алматы қаласында (7 мың) және Ақмола облысында (6,9 мың) жарияланды.
Сұраныстың басым бөлігі – 38,8%-ы орта деңгейдегі мамандарға тиесілі. Төмен біліктілік талап етілетін орындар 30,7%-ды, ал жоғары білікті мамандар үлесі 30,5%-ды құрады.
Қазіргі уақытта 11 мыңнан астам вакансия бойынша айлық жалақы 300 мың теңгеден жоғары. Ең жоғары жалақы білікті мамандарға ұсынылады.
Атап айтқанда:
- IT саласында – 2 млн теңгеге дейін;
- Өндіріс саласында – 1,7 млн теңгеге дейін;
- Құрылыс саласында – 1,2 млн теңгеге дейін;
- Ауыл шаруашылығы мен денсаулық сақтау саласында – 1 млн теңгеге дейін;
- Білім беру саласында – 750 мың теңгеге дейін жалақы ұсынылады.
Жалпы, 2026 жылдың басынан бері Enbek.kz платформасында 709 мың бос жұмыс орны мен 877,2 мың түйіндеме жарияланған.
