2 шілдеде Қазақстанда Әскери-әуе күштері күні атап өтіледі, деп хабарлайды inbusiness.kz сайты.
Бұл – әскери ұшқыштар, инженерлер және авиация саласы мамандарының кәсіби мерекесі.
Мереке 1998 жылғы 2 шілдеде Қазақстан Республикасы Қарулы күштері Әуе қорғанысы күштері құрамында Әскери-әуе күштерінің құрылуына байланысты белгіленген.
Әскери-әуе күштерінің негізгі міндеті – елдің әуе кеңістігін қорғау, әуе шабуылына қарсы тұру және стратегиялық нысандарды әуеден жасалатын соққылардан сақтау.
Өзінің даму кезеңінде Әскери-әуе күштері заманауи техникамен жабдықталған, жоғары ұтқыр әскери құрылымға айналды. Құрамында Су-30СМ, Су-27 жойғыш ұшақтары, L-39 оқу-жауынгерлік ұшақтары, Ми-171Ш және Ми-35М тікұшақтары, сондай-ақ С-295, А-400 және L-410 әскери-көліктік ұшақтары бар.
Әскери-көліктік авиация гуманитарлық және бітімгерлік миссияларда белсенді қолданылады. Мәселен, А-400 ұшағы арқылы 500 тоннадан астам жүк тасымалданып, оның ішінде Ауғанстанға гуманитарлық көмек жеткізілген.
Әскери-әуе күштерінде жауынгерлік даярлық жүйесі үнемі жетілдіріліп, әскери қызметшілер заманауи бағдарламалар бойынша оқытылады. Халықаралық оқу-жаттығулар бөлімшелердің өзара іс-қимылын нығайтуға ықпал етеді.
Ұшқыштар мен инженерлік-техникалық мамандардың күнделікті қызметі елдің қорғаныс қабілетін нығайтуға және Әскери-әуе күштерінің жоғары жауынгерлік әзірлігін сақтауға үлес қосып келеді.
