Бұл туралы Ұлттық экономика министрі Серік Жұманғарин мәлімдеді. Оның сөзінше, Қазақстанда шағын және орта бизнес (ШОБ) соңғы 5 жылда тұрақты өсім көрсеткен, деп хабарлайды inbusiness.kz сайты.
Министрдің сөзінше, осы уақыт аралығында шағын және орта бизнес саласында жұмыспен қамтылғандар саны шамамен 30 пайызға көбейген.
2026 жылдың 1 маусымындағы жағдай бойынша, еліміздегі салық төлеушілердің жалпы саны 2,806 миллионға жеткен. Бұл статистика жыл басымен салыстырғанда 367 мыңға көп болып тұр.
Сондай-ақ, өзін-өзі жұмыспен қамтыған азаматтардың саны 543,5 мың адамға дейін өсім көрсетті.
Серік Жұманғариннің мәліметінше, биылғы 5 айдың қорытындысында салық түсімдері өткен жылмен салыстырғанда 18 пайызға артқан. Оның арасында қосылған құн салығынан (ҚҚС) түскен түсімдер 45,1 пайызға өскен.
