2026 жылдың алғашқы жеті айында Қазақстанның жедел медициналық жәрдем қызметі 5,2 миллионнан астам шақыртуға қызмет көрсетті, деп хабарлайды inbusiness.kz сайты.
Ұлттық шұғыл медицинаны үйлестіру орталығының мәліметінше, нақты көрсеткіш 5 253 200 шақыртуды құрады. Бұл тәулігіне орта есеппен 25 мыңға жуық шақырту деген сөз.
Бүгінде елімізде 20 дербес жедел медициналық жәрдем станциясы, 92 қалалық қосалқы станция және 189 аудандық бөлімше жұмыс істейді.
Күн сайын кезекшілікке 1669 көшпелі бригада шығып, тұрғындарға тәулік бойы медициналық көмек көрсетеді. Жедел қызметте 2728 арнайы көлік қолданылады, оның 1733-і қалада, 995-і ауылдық жерлерде жұмыс істейді.
Жедел жәрдем бригадалары инфаркт, инсульт, жарақат, түрлі аурулардың асқынуы кезінде көмек көрсетіп, жол-көлік оқиғаларына және шұғыл жағдайларға жедел әрекет етеді.
Денсаулық сақтау жүйесінде жедел медициналық көмектің сапасы мен қолжетімділігін арттыру жұмыстары жалғасуда. Бұл бағытта автопарк жаңартылып, қызмет көрсету жүйесі жетілдіріліп, мамандардың біліктілігі арттырылып келеді.
