Қазақстанда жаңартылатын энергия көздерінен (ЖЭК) электр энергиясын өндіру көлемі соңғы он жылда айтарлықтай өсті, деп хабарлайды inbusiness.kz сайты.
2025 жылдың қорытындысы бойынша ірі су электр станцияларын қоса есептегенде, ЖЭК-тің елдегі жалпы электр энергиясын өндірудегі үлесі 14,5%-ды құрады. Ал ірі су электр станцияларын есепке алмағанда, бұл көрсеткіш 7%-ға жетті.
Ірі су электр станцияларын қоса есептегенде, ЖЭК-тен өндірілген электр энергиясының көлемі 2015 жылы 9,5 млрд кВт·сағат болса, 2025 жылы 17,9 млрд кВт·сағатқа дейін өсті. Осы кезеңде олардың жалпы электр энергиясын өндірудегі үлесі 10,4%-дан 14,5%-ға артты.
Ал ірі су электр станцияларын есепке алмағанда, жаңартылатын энергия көздерінің үлесі 2015 жылғы 0,6%-дан 2025 жылы 7%-ға дейін өсті.
Сонымен қатар осы көздерден өндірілген электр энергиясының көлемі 536,5 млн кВт·сағаттан 8 693,6 млн кВт·сағатқа дейін жетті. Яғни он жыл ішінде өндіріс көлемі 16 еседен астам артқан.
