Борттағы 15 адамның барлығы көз жұмды, деп хабарлайды inbusiness.kz сайты adaderana.lk порталына сілтеме жасап.
Колумбияда жоғалып кеткен 13 жолаушы мен екі экипаж мүшесі бар "Кукута-Оканья" рейсін орындаған Satena ұшағы апатқа ұшырап, борттағылардың барлығы қаза тапқан.
– Бірлескен үйлестіру штабы бүгінде байланыс үзілген Satena ұшағының табылғанын растады. Ұшақ Курасика аймағында, Ла-Плайя-де-Белен муниципалитетінің ауылдық жеріне құлады, – делінген портал таратқан ақпаратта.
Hk4709 борттық нөмірі бар Beechcraft 1900 ұшағы коммерциялық мақсатта ұшқан. Әуе кемесі Кукута-Оканья бағытымен ұшып, түстен кейін радардан жоғалып кетті.
Жергілікті БАҚ-та жарияланған тізімге сәйкес, жолаушылар арасында Колумбия депутаты Диогенес Кинтеро және депутаттыққа үміткер Карлос Сальседо болды.
