"Қорқынышты мәселе": Депутаттар Салтанат Нүкенованың жантүршігерлік өлімін еске алды

1105

Тұрмыстық зорлық-зомбылық қорқынышты мәселе, оған статистика бойынша әйелдер мен балалар жиі ұшырайды.

"Қорқынышты мәселе": Депутаттар Салтанат Нүкенованың жантүршігерлік өлімін еске алды Фото: ашық дереккөз

Мәжіліс депутаттары бірінші оқылымда әйелдер құқығы мен балалардың қауіпсіздігіне қатысты түзетулерді қабылдады. Талқылау барысында Мәжіліс депутаты Елнұр Бейсенбаев Қазақстанда тұрмыстық зорлық-зомбылық үшін жазаны қатайтуға түрткі болған Салтанат Нүкенованың өлімін еске алды, деп хабарлайды inbusiness.kz сайты.

"Тұрмыстық зорлық-зомбылық қорқынышты мәселе, оған статистика бойынша әйелдер мен балалар жиі ұшырайды. Жыл сайын Қазақстанда тұрмыстық зорлық-зомбылық салдарынан жүздеген азамат қайтыс болады. Бұл мәселе Мемлекет басшысының бақылауында. Салтанат Нүкенованың жантүршігерлік өлімі қоғамда наразылық толқынын тудырды. Тұрмыстық зорлық-зомбылық үшін жазаны қатайтуды қолдайтын онлайн петиция жарияланып, оған 150 мыңнан аса қол жиналды", - деді Елнұр Бейсенбаев.

Депутат Президент Қасым-Жомарт Тоқаевтың Egemen Qazaqstan газетіне берген сұхбатында петицияны қолдап, қазақстандықтардың пікірі ескерілетініне уәде бергенін еске салды.

"Осының негізінде бүгінде заң тағы да қатайтылды, енді дене жарақатын келтіру және денсаулыққа жеңіл зиян келтірумен байланысты қылмыстарға жауапкершілік Әкімшілік құқық бұзушылық туралы кодекстен Қылмыстық кодекске ауыстырылды. Осылайша, ұрып-соғу, тіпті денсаулыққа жеңіл зиян келтіру деректері Қылмыстық кодекс аясында қаралады", - деді депутат.

Ол Amanat фракциясы бір топ депутаттар бастамашы болған әйелдер құқығы мен балалардың қауіпсіздігін қамтамасыз ету мәселелері бойынша заңнамалық түзетулерді қабылдауды қолдайтынын атап өтті. Отырысқа қатысқан 93 депутаттың 91-і түзетулерді қолдап дауыс берді. Бір депутат қалыс қалды, біреуі қарсы дауыс берді.

Әйелдердің құқығын және балалардың қауіпсіздігін қамтамасыз ету туралы заң жобасы, сондай-ақ Әкімшілік құқық бұзушылық туралы кодекске енгізілген өзгерістер әйелдер мен балаларға қатысты қылмыстардың көптеген түрлерін қылмыстық жауапкершілікке тартуды көздейді.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу
Telegram арнамызға жазылыңыз! Жаңалықтар туралы бірінші біліңіз
Жазылу