Бұл туралы Парламент отырысында депутат Мейкінбек Әбдалиев мәлімдеді, деп хабарлайды Inbusiness.kz 24.kg ақпарат агенттігіне сілтеме жасап.
Оның айтуынша, АҚШ-тағы қырғыз еңбек мигранттары Ресейдегілерге қарағанда көбірек табыс табады.
"Ресейдегі мигранттар айына орта есеппен 500 доллар алады. АҚШ-та біздің отандастарымыз такси жүргізушілері мен көлік жүргізушілері ретінде жұмыс істеп, 10-30 мың доллар табады. Тіпті Америкадағы ең жалқау мигранттың өзі кем дегенде10 мың доллар пайда көреді, сөйтіп бүкіл ауылды асырап отыр. Біз, әрине, Ресейді құрметтейміз, бірақ АҚШ-тағы жұмыс біздің мигранттарымызға тиімдірек", - деді Әбдалиев.
Ол республиканың әлеуметтік қамсыздандыру және көші-қон министрі Құдайберген Базарбаевқа азаматтарды жұмысқа орналастыру бойынша АҚШ үкіметіне жүгінуді ұсынды.
"Елшілікке, Үкіметке хабарласыңыз. Егер олар 2-3 компанияға АҚШ-тағы қырғыз азаматтарын жұмыспен қамтуға рұқсат берсе, біз оларды оқыта аламыз, лицензия алуға және ресми түрде жұмыс істеуге көмектесеміз. Менің мәліметтерім бойынша, АҚШ-қа 100 мыңға жуық трактор жүргізушісі қажет", - деп ұсынды депутат.
Министр бұл мәселе шешіліп жатыр деп жауап берді.
"Біз қазірдің өзінде дамыған елдерде Қырғызстан азаматтарын жұмысқа орналастыру бойынша шаралар жүргізіп жатырмыз. Биыл Оңтүстік Кореяға квота 500-ден 2 мыңға дейін өсті. Алғаш рет Англияға жұмысқа жіберілді. Жақында АҚШ-тағы отандастардан қырғызстандықтарды жұмысқа орналастыру туралы ұсыныс түсті. Мәселе қаралуда", - деді ол.
