Дипломаттар екі ел арасындағы тату көршілік қатынастардың ерекше сипатын атап өтіп, қазақстандықтарға жаңа жылда амандық пен береке тіледі.
Алғаш болып Қазақстан Республикасындағы ҚХР Төтенше және Өкілетті Елшісі Хань Чуньлинь құттықтау сөз сөйледі.
"Дәстүрлі қазақ мерекесі – Наурыз мейрамының келуіне орай, мен Қытайдың Қазақстандағы Елшілігі атынан және өз атымнан достас Қазақстан халқына шын жүректен құттықтауымды және ізгі тілегімді білдіремін. Соңғы жылдары екі мемлекет басшыларының стратегиялық жетекшілігімен Қытай мен Қазақстан арасындағы мәңгі әрі жан-жақты стратегиялық серіктестік үздіксіз нығайып, жаңа деңгейге көтеріліп келеді. Екі ел бірлесіп, Қытай-Қазақстан тағдырлас қауымдастығын құрудың жаңа кезеңіне қадам басып, тату көршілік, достық және өзара тиімді ынтымақтастық жолын жалғастыруда. Наурыз – көктемнің келуін, табиғаттың жаңаруын және жаңа жылдың басталуын білдіретін мереке. Осы орайда Қазақстанның дамуына жаңа әрі зор жетістіктер тілеймін, Қазақстан халқына бақыт пен амандық, ал Қытай-Қазақстан достығына мәңгілік беріктік тілеймін!" – деді ол.
Құттықтауға ҚХР-дың Алматыдағы Бас консулы Су Фанцю да қосылды.
"Қытайдың Алматыдағы Бас консулдығы атынан қонақжай әрі мейірімді Қазақстан халқына мерекелік құттықтауымды жолдаймын. Осы жаңа көктемде Қытай мен Қазақстан арасындағы достық күн сайын жаңарып, одан әрі нығая берсін. Ынтымақтастығымыздың жаңа жарқын сәттерін асыға күтеміз. Екі ел арасындағы достық мәңгі болып, ортақ өркендеуге және жарқын болашаққа бірге қадам басуымыз жалғаса берсін", – деді ол.
Дипломатиялық құттықтауды ҚХР-дың Ақтөбедегі Бас консулы Го Юй аяқтап, Қазақстандағы отбасыларға бейбіт өмір, келісім мен көктемнің жылуын тіледі. Сондай-ақ ол осы маңызды кезеңде екі ел өңірлері арасындағы мәдени алмасу мен байланыстарды нығайтудың маңызын атап өтті.
