Қытай әскері АҚШ-тың Өкілдер палатасының спикері Нэнси Пелосидің Тайванға жасаған сапарынан кейін арал маңында басталған жаттығулардың жалғасатынын мәлім етті, деп хабарлайды inbusiness.kz жергілікті БАҚ-қа сілтеме жасап.
Бұған дейін оқу-жаттығулардың 4-7 тамыз аралығында өтетіні жарияланған еді. Әскерилер Тайвань аралының айналасындағы теңіз және әуе кеңістігінде шабуылдау жоспары бойынша жаттығулар жасауын жалғастырады, сүңгуір қайықтар мен әуе шабуылдарының мүмкіндіктерін тексереді.
Оқу-жаттығулардың аяқталу мерзімі жарияланбады.
2 тамызда АҚШ-тың Өкілдер палатасының спикері Нэнси Пелоси Тайваньға барған еді. ҚХР-дың СІМ Пелосидің сапарына байланысты қатаң шаралар қабылданатынын жариялап, АҚШ-тың Қытайдағы елшісіне ескерту жасады. Ресми Бейжің спикердің Тайваньға баруы "Бір Қытай" қағидатын және қытай-америкалық коммюникесінің ережелерін бұзып отырғанын мәлім етті.
Табиғат Нұрболат
