Цзянси провинциясының Наньчан қаласындағы сот Шанхай партиясының тұрақты комитетінің бұрынғы мүшесі Чжу Чжисонды аса ірі көлемде пара алғаны үшін 2 жылға кейінге қалдырумен өлім жазасына кесті, деп хабарлайды inbusiness.kz сайты "Синхуа" агенттігіне сілтеме жасап.
Тергеу барысында айыпталушы 2003 жылдан 2024 жылға дейін қызметтік жағдайын жеке пайдасы үшін пайдаланғаны анықталды. Партиялық және мемлекеттік лауазымдарды атқара отырып, ұйымдар мен жеке тұлғаларға бизнес жүргізуге, құрылыс келісімшарттарын, несиелер мен қаржыландыру алуға көмектескен.
Параның жалпы сомасы 139 миллион юаньнан асты, бұл 19,46 миллион долларға тең. Сот шешімімен Чжу Чжисон екі жылға кейінге қалдырумен, саяси құқықтарынан өмір бойы айырумен және барлық жеке мүлкін тәркілеумен өлім жазасына кесілді.
Екі жылға кейінге қалдыру жеңілдететін мән-жайларға байланысты берілді. Сотталушы кінәсін толық мойындады, өкініш білдірді және бұрын белгісіз болған сыбайлас жемқорлық істерін ерікті түрде ашты.
Қытайдың заң тәжірибесінде, егер сотталған адам екі жылдық сынақ мерзімі ішінде жаңа қылмыс жасамаса, шартты түрде өлім жазасы әдетте өмір бойына бас бостандығынан айырумен ауыстырылады. Бұл жаза болашақта үлгілі мінез-құлығына байланысты қысқартылуы мүмкін.
