Осы құрылыс маусымында Қызылорда облысында жергілікті желінің 45 жобасы жол жұмыстарымен қамтылып, 2021 жылдың соңына қарай олардың 21-і пайдалануға беріледі, деп хабарлайды inbusiness.kz ИИДМ баспасөз қызметіне сілтеме жасап.
Өңірдегі облыстық және аудандық маңызы бар жолдардың ұзындығы 2381 шақырымды құрайды. Бүгінде нормативтік жағдайдағы автожолдардың үлесі 70%.
Қазір облыста жөндеу жұмыстарымен 248 шақырым жол қамтылған. Атап айтқанда, Қызылорда қаласындағы басты көше жолының "Батыс Еуропа-Батыс Қытай" тас жолымен, сондай-ақ аудандық маңызы бар "Самара-Шымкент-Қамыстыбас-Аманөткел-Жаңақұрылыс" автожолымен түйіскен жерінде көлік айырығының құрылысы жүргізілуде. Бұдан бөлек, аудандық маңызы бар "Әйтеке би-Қазалы" жолын, "Самара-Шымкент-Екпінді", "Әйтеке би-Басықара" және "Самара-Шымкент-Еңбек-Есет батыр-Жаңадария" жолдарындағы көпірлерді, сондай-ақ Есет батыр елдімекеніне кіреберісті реконструкциялау жүргізілуде.
Сонымен қатар Қызылорда облысында биыл жергілікті желінің 31 автожол жобасына орташа жөндеу жұмыстары жүргізілуде.
