Қызылорда облысында "Қауіпсіз жол" жедел-профилактикалық іс-шарасы барысында жол қозғалысы саласында 1200 әкімшілік құқық бұзушылық анықталды, деп хабарлайды inbusiness.kz сайты.
Полиция 361 жүргізушінің қауіпсіздік белдігін тақпағанын немесе жолаушыларды тасымалдау талаптарын бұзғанын анықтады. Сондай-ақ көлік жүргізу кезінде ұялы телефон пайдаланудың – 113, міндетті техникалық қарап-тексеруден өтпеген көліктердің – 81, жолаушылар мен багажды тасымалдау қағидаларын бұзудың 98 дерегі тіркелді.
Бұдан бөлек, көлікті мас күйінде басқарудың 8, жүргізуші куәлігі жоқ адамдардың көлік басқаруының 59, көлік жүргізу құқығынан айырылғандардың қайта көлік басқаруының 8 дерегі анықталды.
Іс-шара нәтижесінде 91 автокөлік арнайы айып тұрағына қойылып, тағы 206 көліктің мемлекеттік нөмірлік белгілері алынды.
Полиция жол қозғалысына қатысушыларды қауіпсіздік талаптарын сақтауға шақырды.
