Оған балаклава, медициналық мақсаттан тыс бетперде, никаб пен адамның бет-жүзін толық немесе ішінара жабатын өзге де киім түрлері кіреді, деп жазады inbusiness.kz сайты.
Қызылорда облысында қоғамдық орындарда адамның бет-әлпетін тануға кедергі келтіретін киім үлгілеріне қатысты заң талаптарын түсіндіру жұмысы тұрақты түрде жүргізіліп келеді.
– Жыл басынан бері облыс бойынша аталған бапқа қатысты 303 әкімшілік құқық бұзу дерегі тіркелді. Соның 301-іне ескерту берілсе, 2-іне айыппұл салынды. Іс-шара барысында полиция қызметкерлері тұрғындармен кездесіп, заң талаптарын түсіндіріп, ақпараттық жадынамалар таратты.
Сонымен қатар азаматтардың сұрақтарына жауап беріп, қоғамдық орындарда құқықтық сауаттылықты арттыруға бағытталған жұмыс жүргізді. Әсіресе, сауда-ойын-сауық орталықтарында, білім беру ұйымдарында және адамдар көп шоғырланатын орындарда профилактикаға мән беріледі, – делінген облыстық полиция департаментінің хабарламасында.
Мұндай іс-шаралардың негізгі мақсаты – азаматтарды жауапкершілікке тарту емес, құқықбұзушылықтың алдын алу.
Заң талаптарын алғаш рет бұзған азаматтарға ескерту жасалады. Құқық бұзушылық тағы да қайталанса заңнамаға сәйкес 10 айлық есептік көрсеткіш мөлшерінде әкімшілік айыппұл салынады.
