Жер заңнамасының бұзылуын Маңғыстау көлік прокуратурасының қызметкерлері анықтады, деп хабарлайды inbusiness.kz сайты.
Белгілі болғандай, аумағы 50 гектар болатын жер учаскесі аэродром маңындағы аумақ шегінде жеке тұлғаларға заңсыз берілген. Жер қатты қоқыс алаңын орналастыру үшін бөлінген.
Мәміленің заңсыздығынан бөлек, прокурорлар ресурстардың пайдаланылмау фактісін тіркеді:
- Учаске 10 жылдан астам уақыт бойы жеке тұлғалардың қолында болған;
- Осы уақыт ішінде жер нысаналы мақсаты бойынша ешқандай пайдаланылмай, бос жатқан.
"Прокурорлық қадағалау актісі бойынша кадастрлық құны 870 миллион теңге болатын бұл жер учаскесі мемлекет меншігіне толықтай қайтарылды", – деп хабарлады ведомстводан.
Көлік прокуратурасы аэродром маңындағы аумақтарда құқық бұзушылықтарды анықтау бойынша жұмыстарды жалғастыратынын айтты.
Бұл мемлекет мүддесін қорғау үшін ғана емес, сонымен қатар ұшу қауіпсіздігін қамтамасыз ету үшін де қажет. Өйткені ұшу-қону жолақтарының жанында қоқыс үйінділерінің пайда болуы құстарды шоғырландырып, авиацияға тікелей қауіп төндіреді.
