Маңғыстау мемлекеттік мүлік және жекешелендіру департаменті басшысының орынбасары Тахир Шукралиевтің айтуынша, қызметкерлер өздерінің ыхтиярынсыз лауазымды қызметіне немесе қызметтік міндеттерін орындауға байланысты берілген, жария және ресми іс-шаралар барысында алынған сыйлықты күнтізбелік 7 күн ішінде мемлекеттік мүлік жөніндегі уәкілетті органға беруі тиіс. Мұндай сыйлықтар мемлекеттік мүліктің құрамына түсетін болады.
“Мемлекеттік қызметшілер берілген сыйлықты департаментке тапсырар алдында сатып алудан бас тарту туралы жазбаша хабарламаны қосып беруі керек. Содан кейін ғана сыйлықты өткізуге құқылы. Ал, мемлекеттік қызметкерлерден түскен сыйлықтар аукционға шығарылып, одан түскен ақша республикалық бюджетке аударылады”, –Тахир Шукралиев.
Сыйлық алу және беру ҚР заңнамасына сәйкес тәртіп бұзушылық ретінде қарастырылады. Бұған жол берген мемлекеттік қызметшілер жауапкершілікке тартылады.
Бұл заңбұзушылықтар жемқорлық болып есептеліп, барлық қызметкерлерді сыбайлас жемқорлыққа қарсы іс-қимыл саласындағы заңнаманы және әдеп кодексінің талаптарын сақтауға, әрқашан заң аясында шешім қабылдауға шақырды мамандар.
