Қаржы министрі Мәди Тәкиев биылғы тоғыз айдың көрсеткіші бойынша мемлекеттік қаржының атқарылуы туралы баяндады, деп хабарлайды inbusiness.kz сайты.
"Трансферттерді есепке алмағанда, мемлекеттік бюджеттің кірістері 20,2 трлн теңгені құрап, жоспар 98,5%-ға орындалды. Өткен жылмен салыстырғанда өсім қарқыны 16,3%-ға жетіп, 2,8 трлн теңгені құрады. Бұл ретте өткен жылмен салыстырғанда салық түсімдері 3 трлн теңгеге артып, жалпы өсім қарқыны 130,3%-ды құрады", – деді министр Үкімет отырысында.
Өткен жылдың осы кезеңімен салыстырғанда, республикалық бюджет кірістері 2,7 трлн теңгені құрап, шамамен 26%-ға артқан. Түсімдердің өсіміне экспорттық тауарлардың әлемдік бағасы, сауда айналымының өсімі және салық мөлшерлемесінің өзгеруі әсер етті.
Айта кету керек, бұған дейін жыл басынан бері 356 мың жеке кәсіпкер есептен шығарылғанын жазғанбыз.
