Жиынға Үкімет мүшелері, Президент Әкімшілігінің құрылымдық бөлімшелерінің басшылары, облыстар мен республикалық маңызы бар қалалар әкімдерінің орынбасарлары, өңірлік басқармалардың жетекшілері қатысты.
Мемлекеттік кеңесші Президент Жарлығымен алғаш рет ішкі саясаттың негізгі бағыттары, мақсаттары мен міндеттері мемлекеттік деңгейде қалыптастырылып, жүйеленгенін атап өтті. Ерлан Қариннің айтуынша, бұл құжат ішкі саясат саласындағы мемлекеттік органдардың жұмысын тиімді үйлестіруге бағытталған. Сонымен қатар жүргізіліп отырған мемлекеттік саясаттың идеялық мәнін нақты түсіндіруге мүмкіндік береді.
Сондай-ақ Мемлекеттік кеңесші жаңа Конституция жобасының маңызына тоқталды.
– Алғаш рет Ата Заңның преамбуласында және алғашқы баптарында мемлекеттілігіміздің іргелі негіздері — Тәуелсіздік пен Егемендік, сондай-ақ, мемлекеттің негіз құраушы қағидаттары ерекше бекітілді. Осылайша, жаңа Ата Заңда негізгі құқықтық нормалар мен құжаттар ғана емес, біздің қоғамның басты мақсаттары мен бағдарлары да орнықты. Негізгі Заң жобасының идеялық-құндылық тұрғысынан алғандағы маңызы зор. Егер басты құжат референдумда қабылданып жатса, жаңа Конституция қоғам тұтастығының сапалы әрі жаңа деңгейдегі платформасына айналады, – деді Ерлан Қарин.
Кеңес барысында Президенттің Ұлттық құрылтайдың Қызылордада өткен бесінші отырысында берген тапсырмаларын орындау, сонымен қатар ұлтаралық және конфессияаралық келісімді нығайту, қоғамдық бірлестіктермен және сарапшылармен қарым-қатынас жасау, мәдени-гуманитарлық, ақпараттық, отбасылық және жастар саясатын жүргізу мәселелері қаралды.
Кеңес қорытындысы бойынша жауапты мемлекеттік органдарға ішкі саясат саласындағы жұмыстың негізгі бағыттарын нақты жүзеге асыру бойынша тиісті тапсырмалар берілді.
