ҚР Ғылым және жоғары білім министрлігінің мәліметінше, латын әліпбиін әзірлеу жұмыстары әлі де жалғасуда. Бұған дейін жаңа әліпбидің бірнеше жобасы көпшілікке ұсынылды, деп жазады inbusiness.kz сайты.
Дегенмен Президенттің нұсқауы бойынша оны әлі де жетілдіруді қажет етеді. Жаңа әліпби мен емле ережелерін Ахмет Байтұрсынов атындағы тіл білімі институтының, "Тіл-Қазына" орталығының мамандары және қазақстандық университеттердің ғалымдары әзірлеп жатыр.
""и", "й", "ы" және "і" сияқты жеке әріптердің емлесін тексеру нәтижелерін зерттеуді жалғастырып жатыр. Сондықтан әліпбиді түпкілікті бекіту мерзімі әлі белгісіз. Жаңа әліпбиді бекіту мерзімі және оны енгізу жоспарлары жобаны жетілдіру аяқталғаннан кейін анықталады", – деп хабарлады министрлік.
Латын әліпбиін әзірлеу жұмыстары сегіз жылдан бері жалғасып келеді. Министрлік бұл жобаға бюджеттен қанша қаражат жұмсалғанын ашып айтпады. Дегенмен, бөлінген қаражаттың едәуір бөлігі игерілмегендіктен, қазынаға кері қайтарылған.
Әліпби әлі ресми бекітілмесе де, Қазақстанның тіл саясаты тұжырымдамасында латын қарпін қолдану көрсеткіштері белгіленген. Құжатқа сәйкес, латын негізіндегі қазақ әліпбиін пайдаланушылардың үлесі 2027 жылға қарай 5%, 2028 жылға қарай 10% және 2029 жылға қарай 15%-ға жетуі керек.
Өткен аптада Түркі академиясы қазақ латын әліпбиінің жаңа нұсқасын мақұлдағанын хабарлады. Онда қазақ тілінің нақты дыбыстарын білдіру үшін ä, ï, ö, ü, ğ, ñ және ş сияқты таңбаларды пайдалану, жаңа әліпбиге толық көшу мерзімі 2031 жылға жоспарланып отыр.
