Қосылған құн салығы (ҚҚС) жеңілдігін қолдану талаптары нақтыланды, деп хабарлайды inbusiness.kz сайты.
Жеңілдікті қолдану үшін қызметкерлердің жалпы санының кемінде 51%-ын мүгедектігі бар адамдар құрауы және олардың еңбекақысына жұмсалатын шығындар жалпы еңбекақы қорының кемінде 51%-ын құрауы туралы талап жеткіліксіз.
Сонымен қатар, бір мезгілде қосымша екі шарт орындалуы тиіс: мүгедектігі бар қызметкерлердің саны кемінде 10 адам болуы және тауарлар, жұмыстар немесе қызметтер олардың тікелей қатысуымен өндіріліп немесе көрсетілуі қажет.
Аталған талаптар тек есепті тоқсанда ғана емес, оған дейінгі төрт салықтық кезеңде де сақталуы тиіс. Қосылған құн салығы (ҚҚС) бойынша салық кезеңі күнтізбелік тоқсан болып табылатындықтан, көрсетілген шарттар әр тоқсанның барлық айларында орындалуы міндетті.
Егер осы кезеңдердің кез келгенінде мүгедектігі бар қызметкерлер саны 10 адамнан аз болса, қосылған құн салығынан босату құқығы берілмейді.
