Нұр-Сұлтанға тартылған барлық инвестицияның 81%-ы шағын және орта бизнестің (ШОБ) үлесінде. Бұл туралы елорда әкімі Алтай Көлгінов айтты, деп хабарлайды inbusiness.kz тілшісі.
Оның пікірінше, елодараға инвестиция тарту - маңызды жұмыстардың бірі.
"Біз тек мемлекеттік бюджетке сенбеуіміз керек. Сондықтан инвестиция тарту, жаңа өндіріс орындарын ашу, шағын және орта бизнесті дамыту үшін жағдай жасау шарт. Осы уақытқа дейін 1 триллион теңгеден асатын 111-ден аса инвестициялық жобаға қолдау көрсеттік", - деді ол.
Алтай Көлгінов инвестициялық жобалар өндіріс, білім беру, денсаулық сақтау, логистика, сауда, спорт, тұрғын үй құрылысы салаларын қамтитынын жеткізді.
Сонымен қатар, қала басшысы Нұр-Сұлтан іскерлік орталыққа айналғанын атап өтті.
"Елордаға бизнес субьектілерінің қызығушылығы бар. Жалпы өңірлік өнім құрылымында шағын және орта бизнестің үлесі – 55%. Бізді бұл көрсеткіш қуантады. Алайда мұнымен шектеліп қалмау керек. Елорданың болашағы зор. Мемлет бизнес өзін жақсы сезіну үшін барлық жағдайды жасап отыр. Қалаға тартылған барлық инвестицияның 81%-ын шағын және орта бизнес (ШОБ) береді", - деді Алтай Көлгінов.
Дәурен Ерболат
