Ғылым және жоғары білім вице-министрі Дархан Ахмед-Заки Батыс Қазақстан облысында оқушылардың ҰБТ тапсыруға трактормен барғанына қатысты пікір білдірді, деп хабарлайды inbusiness.kz сайты.
Тілшілер спикерден "Желіде БҚО-да мектеп оқушыларын ҰБТ тапсыруға трактор тіркемесімен барғаны туралы бейнежазба тарады. Сіз бұл видеоны көрдіңіз бе?" деп сұрады.
"Әрине, бұл видеоны көрдім. Тиісті жауапты тұлғалар жазасын алды. ҰБТ аясында тест тапсыру тетігін жергілікті атқарушы органдар қамтамасыз етуі тиіс. Жалпы алғанда мұны тестілеу орталығы үйлестіреді. Меніңше, жергілікті атқарушы органдар (оқушыларды) тасымалдаудың тиісті жүйесін қамтамасыз етуі қажет", - деді вице-министр Сенат кулуарында.
Ведомство өкілі наурыз айының қорытындысы бойынша 117 мың түлек ҰБТ тапсырғанын жеткізді. Бірыңғай тестілеу енді маусым айында өтеді.
