E-Qazyna платформасында 24 шілдеде сағат 12:00-де бұрын ірі активтерді қайтару істерінде аты аталған тұлғаларға тиесілі болған 56 әшекей бұйымнан тұратын қымбат лот қайтадан аукционға шығарылмақ, деп жазады inbusiness.kz сайты.
Көрсетілген әшекейлердің қатарында әлемдік брендтердің туындылары, сондай-ақ гауһар мен сапфир тастармен көмкерілген әшекейлер бар. Бұған дейін бұл лоттардың бір бөлігі сатылымға шығарылғанымен, ешқайсы сатылмаған болатын.
Аукцион онлайн-форматта өтеді, сондықтан қай қалада тұрғанына қарамастан кез келген адам қатыса алады. Ол үшін E-Qazyna платформасына тіркеліп, кепілдік жарна аударып, белгіленген мерзімде өтінім беру қажет.
Сауда "Қайтарылған активтерді басқару компаниясы" ЖШС жұмысы аясында өтеді – бұл мемлекетке қайтарылған активтерді басқару үшін құрылған мемлекеттік компания. Мұндай активтерді сатудан түскен қаражат арнайы мемлекеттік қорға жіберіледі.
Ұйымдастырушылар барлық процесс толық ашық өтетінін атап өтті: әр лотқа егжей-тегжейлі сипаттама, фото және тәуелсіз бағалау қоса беріледі.
