Батыс Қазақстан облысында мұздатылған ет өнімдеріне жалған сынақ хаттамасы негізінде сәйкестік декларациясы рәсімделгені анықталды, деп хабарлайды inbusiness.kz сайты.
Техникалық реттеу және метрология комитетінің облыстық департаменті санитарлық-эпидемиологиялық бақылау органдарымен бірлесіп жүргізген жұмыс барысында өнімнің сәйкестігін растайтын құжаттар тексерілді.
Өнім Беларусь Республикасының сертификаттау органында рәсімделген ЕАЭО сәйкестік декларациясымен сатылған. Құжатта өнім Алматыдағы аккредиттелген зертханада сыналғаны көрсетілген.
Алайда департамент зертханаға ресми сұрау жолдап, аталған өнімге сынақ жүргізілмегенін және көрсетілген сынақ хаттамасы берілмегенін анықтады. Осылайша, өнімнің қауіпсіздігі мен техникалық регламент талаптарына сәйкестігін растайтын құжаттардың шынайылығы күмән тудырған.
Осыған байланысты сәйкестік декларациясының Қазақстан аумағындағы қолданысы жойылды. Ақпарат тиісті мемлекеттік органдарға жолданды.
Сәйкестікті растау талаптарын бұзған өнім өндіруші әкімшілік жауапкершілікке тартылды.
Департамент сынақтардың нақты жүргізілгенін растамайтын құжаттарды анықтау және қауіпсіздігі расталмаған өнімдердің нарыққа шығуына жол бермеу бойынша жұмысты жалғастырады.
