Өзбекстан үкіметі Ресей, Қазақстан және өзбекстандық мамандар жұмыс істейтін бірқатар елмен еңбек өтілін өзара есептеу және зейнетақымен қамтамасыз ету мәселесі бойынша келіссөз жүргізіп жатыр, деп жазады inbusiness.kz сайты.
Өзбекстан Экономика және қаржы министрлігі жанындағы Бюджеттен тыс зейнетақы қорының атқарушы директорының орынбасары Нуриддин Шадиходжаевтың айтуынша, мұндай келісімдер Қырғызстан және Әзербайжанмен қарым-қатынаста қазір қолданылып келеді.
Мысалы, егер Өзбекстан азаматы Әзербайжанда 10 жыл, ал өз елінде 5 жыл жұмыс істесе, әрбір ел тиісті жұмыс кезеңіне негізделген зейнетақы төлейді.
Шадиходжаев мигранттың ресми жұмысқа орналасуы басты шарт екенін атап өтті. Тек осы жағдайда ғана зейнетақы төлемдерін белгілеу кезінде жұмыс өтілі есепке алынады.
Жоспарланып отырған механизм пропорционалды төлем қағидатына негізделеді. Яғни әр мемлекет азаматтың өз аумағында ресми жұмыс істеген кезеңіне сәйкес зейнетақы төлемдерін қаржыландырады.
Сонымен қатар, шетелде жұмыс істейтін Өзбекстан азаматтары елдің Зейнетақы қорына өз еркімен жарна төлей алады. Олар елге оралғаннан кейін, шетелде жұмыс істеген кезеңі үшін әлеуметтік салықты (мөлшері жылына бір "базалық есептік шама" – 440 000 сум немесе шамамен 37 доллар) 3 жыл ішінде төлеген жағдайда, бұл кезеңді өздерінің еңбек өтіліне қоса алады.
2026 жылғы қыркүйектегі статистикалық деректерге сәйкес, шамамен 1,4 миллион өзбекстандық шетелде жұмыс істеп жүр. Олардың ішінде 834 мыңнан астамы Ресейде, ал 84,5 мыңға жуығы Қазақстанда еңбек етеді. Дәл осы екі мемлекетпен келісімдерге қол қою жүздеген мың азаматтың зейнетақылық құқықтарын қамтамасыз ету үшін аса маңызды мәнге ие.
