Сенаттың жалпы отырысында "Қазақстан Республикасының Үкіметі мен Өзбекстан Республикасының Үкіметі арасындағы Қазақстан-Өзбекстан мемлекеттік шекарасы арқылы өткізу пункттері туралы келісімге 2006 жылғы 4 қыркүйектегі Хаттамаға өзгерістер мен толықтырулар енгізу туралы хаттаманы ратификациялау туралы" заң мақұлданды, деп хабарлайды inbusiness.kz сайты.
Сенатор Әлішер Сатвалдиевтің айтуынша, аталған хаттамаға 2024 жылғы 8 тамызда Астана қаласында қол қойылды.
"Бұл құжат "Сырдария – Малик" және "Целинный – Ок олтин" автомобиль пункттерінің мәртебесін екіжақтыдан халықаралық (көпжақты) мәртебеге өзгертуді көздеген. Сондай-ақ, жұмыс істеу тәртібін "жарық уақыттан" "тәулік бойына" ауыстыруды көздейді. Бұдан басқа, Хаттамада жоғарыда аталған шекаралық өткелдерді "тек жеңіл автокөлік үшін" шектеулі режимінен жүк-жолаушы мәртебесіне көшіру көзделеді. Атап айтқанда, "Целинный – Ок олтин" өткізу пункті жеңіл және бос жүк көлік құралдарының, сондай-ақ ірі көлемді және (немесе) ауыр салмақты жүктер мен тауарлардың жүруі үшін пайдаланылатын болады", – деді депутат.
"Сырдария-Мәлік" өткізу пункті тек жеңіл және бос жүк көліктерінің жүруіне пайдаланылатын болады. Осы өткізу пунктінде жүктер мен тауарларды коммерциялық мақсатта өткізу көзделмейді.
