Бұл туралы Үкімет отырысында Төтенше жағдайлар министрі Сырым Шәріпханов мәлім етті, деп хабарлайды inbusiness.kz cайты.
Оның айтуынша, министрлік мүдделі мемлекеттік органдармен бірлесіп, алдағы су тасқыны кезеңіне дайындықты алдын ала бастады.
2023 жылғы 26 желтоқсанда 2021-2023 жылдарға арналған Су тасқынына қарсы іс-шаралардың Жол картасын орындау қорытындылары туралы Ведомствоаралық мемлекеттік комиссияның жоспардан тыс отырысы өткізілді.
"Бүгінгі күні жоспарланған іс-шаралардың жартысынан сәл астамы немесе 57,7% іске асырылды.
Қалған 92 іс-шара орындалып жатыр.
Бірқатар өңірлерде құрылыс жұмыстары жалғасып жатыр.
Су ресурстары министрлігі Ақмола облысында Есіл су реттегішін салу бойынша жобалау сметалық құжаттамаларын әзірлеп жатыр.
Сондай-ақ, сіздің тапсырмаңыз бойынша аяқталмаған жобалардың көпшілігі әкімдіктермен 2025 жылға дейінгі Әлеуметтік-экономикалық дамудың кешенді және Өңірлерді дамытудың жоспарларына көшірілді", – деді министр Үкімет басшысына.
Сонымен қатар, олардың 27-сін іске асыруда алаңдаушылық бар.
Бұл, әсіресе, Павлодар, Ақтөбе және Солтүстік Қазақстан облыстарына қатысты.
"Жол картасының іс-шараларын аталған облыстар орындамауына байланысты Президент әкімшілігі 2024 жылдың соңына дейін іске асырудың соңғы мерзімін белгіледі. Осыған орай, әкімдіктер қаржы көзін тауып, орындалмаған Жол картасының барлық іс-шараларын (92) қарашаға дейін аяқтауы қажет", – деп қосты министр.
